“ကြာဖြူရေ . အလှပြင်တာမပြီးသေးဘူးလား”
မမငယ် ရဲ့အသံကြောင့် နောက်ဘက်မှာ စုစည်းထားတဲ့ဆံပင်ကို ညီမညီ နောက်ဆုံးအနေနဲ့ တစ်ချက်ကြည့်ပြီး လွယ်အိတ်ကိုဆွဲပြီး အမြန်ထွက်ခဲ့ရတယ်
စက်နှိုးပြီး ထွက်ဖို့အဆင်သင့်ဖြစ်နေတဲ့ မမငယ် ရဲ့ ဆိုင်ကယ်နောက်မှာ ထိုင်လိုက်ရင်း
“ဒီနေ့က အရေးကြီးလို့ မမငယ်ရေ .. ကြာဖြူ ညီနဲ့ ချိန်းထားတယ် .. ကြာဖြူ့ကို ကဲန်တင်းရှေ့မှာပဲ ချခဲ့နော်..”
“ညီမလေး တကယ်ပဲ ညီညီ့ကို အဖြေပေးလိုက်တော့မှာလား”
“မမငယ်ရယ် .. ညီ့ကို စောင့်ခိုင်းခဲ့ရတာ ကြာနေပြီလေ .. ပထမနှစ်ကျောင်းစတက်ကတည်းက ခုဆိုရင် ၂ နှစ်ကျော်နေပြီ .. ကြာဖြူ ငြင်းစရာအချက် မတွေ့ဘူး မမ .. ညီ က စာလည်းတော်တယ် .. ချောလည်းချောတယ် .. မိဘအသိုင်းအ၀ိုင်းကလည်း ပြည့်စုံတယ် .. အဲဒါတွေထက် အဓိကကျတာက ညီ က ကြာဖြူ့ကို တကယ်ချစ်တယ်လို့ ယုံကြည်လို့ပါ .. ညီမလေး လည်း သူ့ကို ချစ်နေမိပြီလေ .. ဒါကြောင့်မို့လို့ ဒီနေ့ အဖြေပေးမယ် လို့ ဆုံးဖြတ်ခဲ့တာ”
“အင်းလေ .. ညီမလေးလည်း အရွယ်ရောက်နေပြီပဲ .. မမငယ် မတားပါဘူး .. ညီမလေး ဆုံးဖြတ်ချက် မမှားနိုင်ဘူးလို့လည်း မမငယ် ယုံကြည်ပြီးသားပါ .. ဒါပေမယ့် အခု ညီမလေးပြောတဲ့အချက်တွေထက် အရေးကြီးတဲ့ အချက် ရှိသေးတယ်နော် ညီမလေး .. မေမေ အရမ်းစိုးရိမ်ပြီး တားမြစ်ထားတဲ့အချက် ညီ နဲ့ လွတ်ရဲ့လား ညီမလေး”
“မမငယ်ရယ် .. ကြာဖြူက မေ့ပါ့မလား .. ဒီအချက်က ကျန်တဲ့သူတွေအတွက် ဘာမှ မဟုတ်ပေမယ့် ကြာဖြူတို့မိသားစုအတွက် အတိတ်ဆိုး တစ်ခုဖြစ်စေခဲ့တာမို့ ကြာဖြူ အရမ်း အလေးထားပါတယ် .. စိတ်ချပါ မမငယ်ရယ် .. ညီ့မွေးသက္ကရာဇ်ကို ကြာဖြူ ရက် (၁၀၀) ပြက္ခဒိန်မှာ တိုက်ထားပြီးပါပြီ .. ညီကလေ မေမေ နဲ့ မငယ် စိုးရိမ်တဲ့ သိပ်ကြောက်တဲ့ ဗုဒ္ဓဟူးသား မဟုတ်ပါဘူး .. မဟုတ်ရပါဘူး မမငယ်ရယ်”
♥ ♥ ♥ ♥ ♥ ♥ ♥ ♥ ♥ ♥ ♥
“သမီးလေးက ချစ်စရာကောင်းလိုက်တာကွယ် .. ဒါကြောင့်လည်း သားက ကြာဖြူ ကြာဖြူ နဲ့ ပါးစပ်ဖျားက မချတာကိုး”
မောင့် မေမေရဲ့ ချီးမွမ်းစကားကြောင့် မနေတတ်စွာဖြင့် မောင့် ကို အကြည့် ..
“မေမေကလည်းဗျာ .. ကြာဖြူ ရှက်သွားဦးမယ်”
“မရှက်ပါနဲ့ သမီးရယ် .. အန်တီတို့က မိသားစုထဲမှာ ပွင့်ပွင့်လင်းလင်း ရှိကြတယ်လေ … သမီးလည်း နောက်ဆို ဒီအိမ်သား ဖြစ်လာရမှာပဲလေ .. ဟိုနေ့က အိမ်မှာ အုန်းနို့ခေါက်ဆွဲ ချက်စားတာ ကြိုမပြောရကောင်းလားဆိုပြီး ညီညီ က ပူညံပူညံ လုပ်သေးရဲ့”
“ဟုတ်တယ်လေ မေမေရဲ့ .. ကြာဖြူ့ကို အဲဒီနေ့ကတည်းက ခေါ်လာလို့ ရတာပေါ့ ..
နောက်တစ်ခါဆို ကြိုပြောပါ့မယ် သားရယ် .. ဟုတ်ပြီလား”
“ဒါနဲ့ ဒီနှစ် သားရဲ့မွေးလ မွေးရက် မွေးနေ့ တိုက်တယ်နော် .. သား ဘာလုပ်ချင်လဲ .. အရင်နှစ်တွေလိုပဲ ဆရာတော့်ကျောင်းကို ဆွမ်းချိုင့်ပို့မလား .. သူငယ်ချင်းတွေကို အိမ်မှာ ဖိတ်ကျွေးချင်လား”
“သားကတော့ ဘာမှ ထွေထွေထူးထူး မလုပ်တော့ဘူးလို့ စိတ်ကူးထားတယ် .. မနက်စောစော ကြာဖြူကို သွားခေါ်ပြီးတော့ ဘုရားသွားမယ် .. ညဘက်ကျတော့မှ သူငယ်ချင်းတွေကို ဆိုင်တစ်ဆိုင်ဆိုင်မှာ လိုက်ကျွေးလိုက်မယ်လေ”
အတိုင်အဖောက်ညီညီပြောနေတဲ့ မောင် တို့ သားအမိနှစ်ယောက်ကိုကြည့်ရင်း ကိုယ့်ကိုယ်ကို ဇဝေဇ၀ါ ဖြစ်လာမိတယ် .. မောင် နဲ့ ကြာဖြူ ချစ်သူဘ၀မရောက်ခင် သူငယ်ချင်းဘ၀မှာကတည်းက သူ့မှတ်ပုံတင်ထဲက မွေးသက္ကရာဇ်ကိုကြည့်ပြီး မွေးနေ့လက်ဆောင် နှစ်တိုင်းပေးနေကျလေ .. အဲဒီအချိန်ကတည်းက မွေးတဲ့ခုနှစ် လ ရက် ကို နှစ်တစ်ရာပြက္ခဒိန်မှာ ကြည့်ပြီး အတည်ပြုထားတဲ့ နေ့က အင်္ဂါနေ့ပါ …. မဟုတ်သေးပါဘူး .. ဒီနှစ် မောင့် မွေးနေ့က ဗုဒ္ဓဟူးနေ့ ကျတယ်လေ .. အန်တီက လူကြီးမို့လို့ မှားပြောတယ် ထားဦး .. မောင် က ဘယ်လိုဖြစ်ပြီး မှားပြောတာပါလိမ့် .. ကြာဖြူ မနေနိုင်စွာနဲ့ပဲ …
“ဒီနှစ် ညီ့မွေးနေ့က ဗုဒ္ဓဟူးနေ့ ကျတယ်မဟုတ်လား”
“ဟုတ်တယ်လေ သမီးရဲ့ ဗုဒ္ဓဟူးနေ့ကျလို့ မွေးနေ့နဲ့ မွေးရက်တိုက်တယ် ပြောတာ .. သား က ဗုဒ္ဓဟူးသားလေ .. နာမည်က အင်္ဂါစာလုံးနဲ့ စပြီး မှည့်ပေးပါဆိုလို့ ညီလင်းမြတ် ဖြစ်နေတာ ..
ကဲ .. သားတို့ သမီးတို့ အေးအေးဆေးဆေး စကားပြောကြဦး .. မေမေ လုပ်စရာလေးရှိသေးလို့”
"မောင့် မွေးနေ့ကို ကြာဖြူ နှစ်တစ်ရာပြက္ခဒိန်မှာ ရှာထားတာ အင်္ဂါနေ့လေ မောင်ရဲ့ ခု မောင့်မေမေက ဗုဒ္ဓဟူးလို့ ပြောသွားလို့”
“ဟားဟားးး ကြာဖြူ ဘာမှလည်း မသိဘူးကွာ .. မောင့် မှတ်ပုံတင် ထဲက တစ်နှစ်ကြီးထားတဲ့ မွေးသက္ကရာဇ်ကို ကြာဖြူက ကြည့်ပြီး ရှာထားတာ ဖြစ်မယ် .. ဟုတ်တယ်မလား ကြာဖြူ”
“အင်း .. ဟုတ်တယ် မောင် .. ဒါဆို မောင့်မေမေပြောတာ အမှန်ပဲပေါ့”
သွားပြီ .. မောင် က ဗုဒ္ဓဟူးသားတဲ့ လား … ကြာဖြူ့နားထဲမှာ ဗုဒ္ဓဟူးသား ဗုဒ္ဓဟူးသား ဗုဒ္ဓဟူးသား ဆိုတဲ့ စကားကလွဲလို့ ကျန်တာတွေ မကြားတစ်ချက် ကြားတစ်ချက်
“ကြာဖြူ ကြာဖြူ “
“ဟင်”
“ဘာငိုင်နေတာလဲ .. ဒီနှစ် မောင့် ကို မွေးနေ့လက်ဆောင် ဘာပေးရင်ကောင်းမလဲ စဉ်းစားနေတာလား နှစ်လနီးပါးလိုပါသေးတယ် ကြာဖြူရာ အေးဆေးစဉ်းစား”
“အင်း .. ကြာဖြူ ခေါင်းကိုက်လာတယ် မောင် ရယ် … အဆောင်ပြန် နားလိုက်ချင်တယ်”
“ဘယ်လိုဖြစ်ရတာလဲ ကြာဖြူရယ် .. အေးအေးဆေးဆေးတောင် မနေရသေးဘူး .. ဘာဆေးသောက်မလဲ .. ဒါမှမဟုတ် သံပုရာရည်လေး သောက်မလား”
“တော်ပြီ မောင် .. အဆောင်ရောက်လို့ နားလိုက်ရင် သက်သာသွားမှာပါ .. မောင့် မေမေကို နှုတ်ဆက်ပြီးရင် ပြန်တော့မယ်နော်”
“အင်းပါကွာ .. ကြာဖြူ့သဘောပါပဲ”
♥ ♥ ♥ ♥ ♥ ♥ ♥ ♥ ♥ ♥ ♥
“ဘာပြောလိုက်တယ် ကြာဖြူ”
“မောင် နဲ့ ကြာဖြူ လမ်းခွဲကြရအောင် လို့ ပြောတာပါ”
“ကြာဖြူ ဘာတွေပြောနေတာလဲ .. မောင့် ကို နောက်နေတာလား”
“တကယ်ပြောနေတာပါ မောင် .. ကြာဖြူတို့လမ်းခွဲကြအောင်”
“အဓိပ္ပါယ်မရှိလိုက်တာကွာ .. ဘာကြောင့် လမ်းခွဲရမှာလဲ .. ကြာဖြူ ရူးသွားတာတော့ မဟုတ်ပါဘူးနော်”
မောင့်ကို လမ်းခွဲဖို့ ဘယ်လိုအကြောင်းပြချက်ပေးရမယ်ဆိုတာကို တစ်ညလုံး စဉ်းစားခဲ့ပေမယ့် အဖြေမထွက်ခဲ့ပါဘူး .. နားမလည်နိုင်စွာနဲ့ ကြာဖြူပုခုံးကို ကိုင်လှုပ်ပြီး မေးနေတဲ့ မောင့် လက်တွေကို အသာဖယ်ချရင်း
“ကြာဖြူ့ကို မေ့လိုက်ပါတော့ မောင် .. ခွင့်လွှတ်ပါလို့လည်း မတောင်းဆိုတော့ပါဘူး .. ကြာဖြူ့ကို မေ့လိုက်ပါ .. မုန်းလိုက်ပါတော့ မောင်”
“ကျွတ် .. ဘာတွေလဲကွာ .. ကြာဖြူ့ကို သိပ်ချစ်တဲ့ မောင်ပါ ကြာဖြူရဲ့ .. ကြာဖြူကလည်း မောင့်ကို သိပ်ချစ်တယ်ဆို .. ဘာလို့မုန်းရမှာလဲ .. ဘာလို့မေ့ရမှာလဲ .. မောင် နားလည်အောင်လည်း ရှင်းပြစမ်းပါဦး ကြာဖြူရယ်”
“ကျောင်းပြီးရင် ကြာဖြူ့မေမေ ဆီမှာ လိုက်ပြီး မြန်းပေးဖို့ကိုတောင် ဖေဖေ နဲ့ မေမေကို မောင် က တောင်းဆိုပြီးနေပြီလေ ကြာဖြူရဲ့ .. ဘယ်လိုနည်းနဲ့မှ ဝေးလို့မဖြစ်ဘူး .. မခွဲနိုင်ဘူး ကြာဖြူ”
“လမ်းခွဲမယ့်စကားပြောမယ့်အစား မောင့် ကို အသေသာသတ်သွားပါလား
ကြာဖြူ့မှာ ဘာအခက်အခဲတွေရှိလဲ .. မောင် တို့ အတူဖြေရှင်းကြမယ်လေ .. နော် .. လမ်းခွဲဖို့တောာ့ ထပ်မပြောပါနဲ့ ကြာဖြူရယ်”
တတွတ်တွတ်ပြောနေတဲ့ မောင့်ကိုကြည့်ရင်း ကြာဖြူ့ ရင်ထဲမှာလည်း ဆို့နင့်လာပါတယ် .. မောင်ရယ် .. ကြာဖြူ့ မောင့်ကို သိပ်ချစ်ပါတယ် .. ကြာဖြူ့ဘ၀မှာ ချစ်သူဆိုလို့ မောင်တစ်ယောက်ပဲ ရှိတာပါ .. ဒါပေမယ့် မောင်ရယ် .. မောင် မသိသေးတဲ့ .. ကြာဖြူ့တို့ မိသားစုရဲ့ အဖြစ်ဆိုးကို ဘယ်လိုအင်အားမျိုးနဲ့ ကြာဖြူ ပြောပြရမှာတဲ့လဲ …
“တောင်းပန်ပါတယ် မောင် .. ကြာဖြူ့ကို ဘာမှ မမေးပါနဲ့တော့နော် .. ကြာဖြူ ပြန်ပါရစေတော့”
ပြောရင်းနဲ့ မျက်ရည်ကျလာတဲ့ ကြာဖြူ့ကို ကြည့်ပြီး မောင် လည်း စိတ်တွေ ရှုပ်ထွေးသွားပုံရပါတယ် ..
“မငိုပါနဲ့ ကြာဖြူ .. ကြာဖြူ့မျက်ရည်ကို မောင် မခံစားနိုင်ပါဘူး .. ကြာဖြူ နားချင်နေပြီဆိုရင် မောင် လိုက်ပို့ပေးပါ့မယ် ဒါပေမယ့် ကြာဖြူ အဲဒီလိုဖြစ်ရတဲ့ အကြောင်းရင်းကို မောင် သိပ်သိချင်တယ် .. ဒီညတော့ မောင် ကြာဖြူ့ကို မနှောင့်ယှက်တော့ပါဘူး။ မနက်ဖြန်မနက် မောင်ဖုန်းဆက်မယ် .. အဲဒီအချိန်မှာ ကြာဖြူ တစ်ခုခုပြောနိုင်လိမ့်မယ်လို့ မောင် မျှော်လင့်ပါတယ်”
မောင်ရယ် .. ဒီတစ်ခါ တွေ့ကြတာ နောက်ဆုံးအကြိမ်ဖြစ်လိမ့်မယ်လို့ မောင် တွေးမိမှာ မဟုတ်ဘူးနော် .. မနက်ဖြန်မနက် အစောဆုံးကားနဲ့ ကြာဖြူ အိမ်ကို ပြန်ဖို့ စီစဉ်ပြီးနေခဲ့ပြီ။ အဆောင်ကို မောင် ဖုန်းဆက်တဲ့အခါမှာ အိပ်ပျော်နေတုန်းလို့ ပြောဖို့ရယ် … လူကိုယ်တိုင် လာမေးတဲ့အခါ နေမကောင်းလို့ နားနေတယ်လို့ ပြောပေးဖို့ရယ် အခန်းဖော် ခိုင့် ကို မှာထားခဲ့မှာပါ မောင်
မောင် စိတ်နာသွားမှာပဲနော် .. လတ်တလောအဖြစ်အပျက်တွေကို နားလည်ရခက်သွားမှာပဲ .. အခုလောလောဆယ် ကြာဖြူကတော့ ရင်တစ်ခုလုံး ကြေမွမတတ်ပါပဲ မောင်ရယ် … မနှစ်က ကျောင်းပြီးသွားတဲ့ မမငယ် ကိုလည်း အရမ်းသတိရတယ် … မမငယ်ရေ .. ကြာဖြူ ဘယ်လိုလုပ်ရပါ့မလဲ .. ခုချိန်မှာတော့ ကြာဖြူ့ကို နားလည်ပေးနိုင်မှာ မမငယ်ပဲ ရှိပါတယ် ..
ကြာဖြူတို့ မိသားစုရဲ့ အဖြစ်အပျက်တွေက ပြန်တွေးမိတိုင်း မနေ့တစ်နေ့ကလိုပဲ နာကျင်နေတုန်းပဲမဟုတ်လား မမငယ်ရယ် ..
♥ ♥ ♥ ♥ ♥ ♥ ♥ ♥ ♥ ♥ ♥
တီ .. တီ .. တီ
အိမ်ရှေ့က ဆိုင်ကယ်ဟွန်းသံကြောင့် မမကြီး ပြန်လာပြီဆိုတဲ့ အသိနဲ့ မမငယ်နဲ့ ကြာဖြူ စာကျက်နေရာကနေ အောက်ထပ်ကို ပြေးဆင်းလာခဲ့တယ်။ ဘာသာရပ်ဆိုင်ရာ သင်တန်းတစ်ခုမှာ စာပြတဲ့ မမကြီးက သူပြန်လာတဲ့အခါ ညီမနှစ်ယောက်အတွက် မုန့်တစ်မျိုးမျိုး အမြဲဝယ်လာတတ်တယ်လေ။ အဲဒီတော့ မမကြီး ဆိုင်ကယ်သံကြားရင် ကြာဖြူတို့နှစ်ယောက်က ဆင်းကြိုနေကျ ..
အောက်ထပ်ကိုရောက်တော့ မမကြီးက လက်ထဲပါလာတဲ့ မုန့်ထုပ်တွေကို မချရသေးဘဲ မေမေနဲ့ ရပ်စကားပြောနေတာကို တွေ့တယ်။
“မေမေ တော့ သိပ်သဘောမကျဘူး သမီး .. တနင်္ဂနွေ နဲ့ ဗုဒ္ဓဟူး လက်ထပ်မယ်ဆိုရင် စီးပွားရေးလည်း အဆင်မပြေဘူး .. ကျန်းမာရေးလည်း ညံ့တယ်တဲ့ .. မေမေ သဘောမတူချင်ဘူး သမီးကြီး သေချာ စဉ်းစားစေချင်တယ်”
“မေမေရယ် .. အဲဒါက ဟိုးရှေးရှေးတုန်းက အယူအဆတွေပါ.. သမီးအယုံအကြည်မရှိဘူး
သမီးလိုပဲ ကိုလွင် ကလည်း အဲဒီအယူအဆတွေကို လက်မခံဘူး”
“ဈေးသုံးလည်းမလွယ်နဲ့ .. ရှေးထုံးလည်း မပယ်နဲ့ တဲ့ သမီးကြီး .. သေချာစဉ်းစားပါဦး ..
အခု သမီးတို့က ချစ်သူတွေဘ၀ပဲရှိသေးတယ် .. အခုအချိန်မှာ နောက်ဆုတ်ကြမယ်ဆိုရင် မီပါသေးတယ် ..
အိမ်ထောင်မှု ဘုရားတည် ဆေးမင်ရည်စုတ်ထိုး .. ဤသုံးမျိုး နောင်ပြင်ရန် ခက်သည့်အမျိုး တဲ့ .. သမီးရယ် .. စဉ်းစားပါနော် .. အိမ်ထောင်ကျပြီးမှ အဆင်မပြေဖြစ်လာမှာကို မေမေ စိုးရိမ်တယ် သမီးကြီး”
“ခက်တယ် မေမေရယ် .. ဒါမျိုးတွေ မေမေ့စိတ်ထဲမှာ ရှိနေတုန်းပဲလား ..
ဘာပဲဖြစ်ဖြစ် သမီးကတော့ ကိုလွင်နဲ့ လက်ထပ်မှ ဖြစ်မယ် မေမေ .. ကိုလွင်က သူ့မိဘတွေကို ဖွင့်ပြောပြီးပြီ .. နောက်လထဲမှာ လာမြန်းချင်တယ်တဲ့ .. မေမေ လက်ခံပေးပါနော်”
မေမေ နဲ့ မမကြီး ပြောနေကြတာတွေကို နားမလည်တစ်ချက် လည်တစ်ချက် .. အဲဒီအချိန်တုန်းက ကြာဖြူက ရှစ်တန်းပဲ ရှိသေးတာလေ။ .. သေချာတာက မေမေက မမကြီး အိမ်ထောင်ပြုမယ့်ကိစ္စမှာ သဘောမတူဘူးဆိုတာတော့ ကြာဖြူ ရိပ်မိတယ် .. ဆယ်တန်းကျောင်းသူ မမငယ်က ပိုသိနိုင်မှာမို့ မေးကြည့်တော့ .. နေ့နာမ် မတည့်လို့ သဘောမတူတာတဲ့ .. မမကြီး ချစ်သူ ကိုကိုလွင်က ဗုဒ္ဓဟူးသား .. မမကြီးက တနင်္ဂနွေသမီး .. အဲလိုဆိုရင် မတည့်ဘူးတဲ့ .. ယူလို့မရဘူးဆိုလား ..
မေမေ သဘောမတူလို့ မမကြီး လမ်းခွဲရမယ်ဆိုရင်တော့ မမကြီး သနားစရာပဲ .. အနေအေးပြီး စကားနည်းတဲ့ ကိုကိုလွင့်ကို ကြာဖြူ နဲ့ မမငယ်က အစ်ကိုတော်ချင်တာလေ ..
မေမေရယ် ခေါင်းညိမ့်လိုက်ပါလို့ စိတ်ထဲကတော့ တောင်းဆိုပေးမိတယ် .. အစ်ကိုမရှိတဲ့ ကြာဖြူတို့က အစ်ကိုတစ်ယောက်ရဖို့ မျှော်လင့်ခဲ့တာ .. ဖေဖေ ဆုံးပြီးကတည်းက အိမ်မှာ ယောင်္ကျားသားမရှိတော့ ကြာဖြူက အားငယ်တတ်တယ်လေ .. ကိုကိုလွင် အိမ်ကိုရောက်လာတဲ့အခါကျရင် ကြာဖြူတို့ကို ဘယ်သူမှ စရဲ နောက်ရဲမှာ မဟုတ်တော့ဘူးပေါ့ ..
ဒါပေမယ့် မမကြီး နဲ့ မေမေ အားပြိုင်ပွဲ မှာ ကြာဖြူ နဲ့ မမငယ်က ပွဲကြည့်သူသက်သက် .. ၀င်ဆုံးဖြတ်ခွင့် အကြံပေးခွင့် မရှိခဲ့ပါဘူး ..
နောက်ဆုံးတော့လည်း စိတ်အားထက်သန်နေတဲ့ မမကြီးကို မေမေ အလျှော့လိုက်ပေးလိုက်ရတာပါပဲ ..
ကြာဖြူ ခြောက်တန်း ကျောင်းတက်စနှစ်မှာပဲ ဆုံးသွားခဲ့တဲ့ ဖေဖေ သာ ရှိနေရင်ရော ဘယ်လိုဆုံးဖြတ်မှာလဲ ဆိုတာ ကြာဖြူ သိချင်ခဲ့သား ..
♥ ♥ ♥ ♥ ♥ ♥ ♥ ♥ ♥ ♥ ♥
နောက်ကျမှ ပြန်လာတတ်တဲ့ ကိုကိုလွင့် ကို ညတိုင်းစောင့်ရတဲ့ မမကြီးကို ကြာဖြူ သနားမိပါရဲ့ .. ညီအစ်မသုံးယောက်နဲ့ မေမေပဲ ရှိတဲ့ ကြာဖြူတို့ရဲ့ အိမ်မှာလိုက်နေတဲ့ မမကြီးရဲ့ အိမ်ထောင်ရေးအခြေအနေက ကြာဖြူ မျှော်လင့်သလို ဖြစ်မလာခဲ့ပါဘူး
အနေအေးပြီး စကားနည်းလို့ လူတော်လေးတစ်ယောက်လို့ ထင်ရတဲ့ ကိုကိုလွင်က ညဘက် ညဘက် အရက်သောက်သောက်လာတတ်တာ … အရက်သောက်လာတိုင်း မမကြီးနဲ့ တိုးတိုးကြိတ်ကြိတ် စကားများကြတာကို အခန်းချင်းကပ်လျက် ကြာဖြူ နဲ့ မမငယ်က အစပိုင်းမှာ သတိမထားမိပေမယ့် နောက်ပိုင်း ရိပ်မိလာခဲ့ရတာ …
တိုးတိုးကြိတ်ကြိတ် ကနေ တဖြည်းဖြည်း ကျယ်လာတဲ့ .. ကြီးလာတဲ့ ရန်ပွဲတွေကို ထပ်ကြုံခဲ့ရတာ .
မာနကြီးပြီး စိတ်ဓာတ်မာကျောတယ်လို့ ထင်ရတဲ့ မမကြီးကလည်း မျက်ရည် ကျကျနေတတ်တာ ..
ကြာဖြူ့အတွက်တော့ စိတ်ညစ်စရာကောင်းတဲ့ နေ့ရက်တွေပါပဲ ..
ဒီလိုနဲ့ ဖြတ်သန်းလာခဲ့ရင်း တစ်နေ့မှာတော့ ကြာဖြူ့ဘ၀မှာ ဘယ်တော့မှ မမေ့နိုင်မယ့် .. သိပ်ခြောက်ခြားခဲ့ရတဲ့ … နောင် .. မကြာခဏ အိပ်မက်ဆိုးတွေ မက်ဖြစ်ခဲ့တဲ့ ဖြစ်ရပ်တစ်ခုနဲ့ ကြုံရပါတော့တယ် ..
♥ ♥ ♥ ♥ ♥ ♥ ♥ ♥ ♥ ♥ ♥
မမကြီးရဲ့ ပူညံပူညံ အသံကို စကြားရကတည်းက ဒီနေ့လည်း စာကျက်ပျက်ဦးမယ် ဆိုတာ ကြာဖြူ တွေးမိလိုက်တယ်
“မင်း မကျေနပ်ရင်လည်း ကိုယ် မတတ်နိုင်ဘူး သရဖီ .. ကိုယ် ဒီထက်ပိုပြီး မရှင်းပြနိုင်ဘူး”
“ဘာပြောတယ် ကိုကိုလွင် .. ရှင့်ဘက်က မှန်နေတယ်ဆိုရင် ရှင် ရှင်းရှင်းလင်းလင်း ရှင်းပြလေ .. ရှင် မှားနေလို့ ရှင်းမပြနိုင်တာပေါ့”
“အဖြစ်မှန်ကို ကိုယ် ပြောထားတယ်လေ .. သက်စုလွင် ဆိုတာ ကိုယ့်ဆရာရဲ့တူမလေး .. အလုပ်ဝင်ကာစမို့ အစစအရာရာ ကိုယ်က သင်ပေးနေရတာ .. အဲဒါကို ဘယ်နှစ်ခါ ထပ်ပြောရမှာလဲ”
“သြော် … အလုပ်သင်တာက အအေးဆိုင်ထိုင်နည်း ကော်ဖီဆိုင်ထိုင်နည်းတွေပါ ပါတယ်ပေါ့လေ …. ထားပါတော့ စားသောက်ဆိုင်မှာ အတူတူထိုင်တဲ့အထိ ရှင့်ကို ကျွန်မ နားလည်မပေးချင်ပေမယ့် လက်ခံထားပါသေးတယ် .. အခု ရှင်တို့က ရုပ်ရှင်ရုံကို ဘာသွားလုပ်တာလဲ .. အဲဒါကိုရော ရှင် ဘာပြောမလဲ”
“အဲဒါ မင်း မှားနေတာလေ .. ကိုယ်တို့ ဘယ်တုန်းကမှ ရုပ်ရှင်အတူမကြည့်ဖူးဘူး .. မင်း စွပ်စွဲချက်တွေ လွန်နေပြီ သရဖီ .. မင်း ကိုယ့် သိက္ခာကို အတော်လေး စော်ကားလွန်းနေပြီ”
“ဟင်းဟင်း .. သိက္ခာ ဟုတ်လား … ရှင့်မှာ သိက္ခာဆိုတာ ရှိသေးတယ်ပေါ့ … တန်ရာတန်ရာ ပြောစမ်းပါ ကိုကိုလွင် .. ကျွန်မ နားခါးတယ်ရှင့်”
“တော်စမ်း သရဖီ .. မင်း ဒီလောက်ထိ ကိုယ့်ကို မယုံကြည်မှတော့ ကိုယ်တို့ ဘာလို့ အတူဆက်နေကြဦးမှာလဲ .. မင်း ဒီလောက် သဘောထား သေးသိမ်မှန်း ကိုယ် ဘာလို့ စောစော မသိခဲ့ရတာပါလိမ့်”
"သြော် .. ရှင်က ဒီစကားတောင် ပြောလာပြီပေါ့ .. သွားပါရှင် သွားပါ .. ကလေးတစ်ယောက်ကို အဖေမပါဘဲလည်း ကျွန်မပြုစုပျိုးထောင်နိုင်တယ်ဆိုတာ ပြရတာပေါ့"
"မင်းလို အသိတရားမရှိတဲ့ အမေရဲ့ လက်ထဲမှာ ငါ့သားကို မထားခဲ့နိုင်ဘူးကွ .. သားကို ငါ ခေါ်သွားမယ်"
တကယ်ပဲ ကိုကိုလွင် က ထွက်သွားတော့မယ် ထင်တယ် .. ကလေးငိုသံပါကြားရလို့ ကြာဖြူ အခန်းတံခါးလေးကို ဟပြီး ကြည့်တော့ သားသားက ကိုကိုလွင်လက်ထဲမှာ .. မမကြီး က အတင်း လိုက်လု .. ကလေးက ငို .. ကြာဖြူ နဲ့ မမငယ်လည်း ဘာလုပ်ရမှန်းမသိဘူး .. အမျိုးတစ်ယောက် နာရေးကို သွားနေတဲ့ မေမေ့ကိုပဲ စိတ်ထဲက သတိရတယ်။ ကိုကိုလွင်ကလည်း မမကြီးကို ကလေးလုံးဝ ပြန်မပေးဘူး .. ဒီလိုနဲ့ လှေကားနား ရောက်တဲ့အထိပဲ .. ရုန်းရင်းဆန်ခတ်နဲ့ တိုင်းပြည်ပျက်နေသလိုပါပဲ .. မမကြီးက ပိုပြီး ဒေါသတွေ ဖြစ်လာတယ်ထင်တယ် .. လက်တစ်ဖက်က ကလေးကို အတင်းဆွဲရင်း တစ်ဖက်က ကိုကိုလွင့်ကို လှမ်းရိုက်လိုက်တယ်… အသားနာသွားတဲ့ ကိုကိုလွင်ကလည်း ရှိသမျှအားနဲ့ ကလေးကို အတင်း ပြန်အဆွဲ ..
အားးးးးး
♥ ♥ ♥ ♥ ♥ ♥ ♥ ♥ ♥ ♥ ♥
အားးးး
"ကြာဖြူ .. အိပ်မက်ဆိုးတွေ မက်နေတာလား .. ထထ ရေလေးသောက်လိုက် .. နေရောကောင်းရဲ့လား .. နင်တစ်ယောက်တည်း ကားစီးလို့ ဖြစ်ပါ့မလား"
မိခိုင် ပေးတဲ့ ရေကို သောက်ရင်း မျက်ရည်တွေပါ ထပ်ကျလာမိပြန်ပါတယ် .. ရက်တွေ လတွေ နှစ်တွေ ပြောင်းပေမယ့် အဲဒီအဖြစ်အပျက်ကို ခဏခဏ အိပ်မက်မက်တယ် ။ လန့်နိုးတိုင်းလည်း တစ်ခါ ထပ်ငိုရပြန်ရော ..
ကိုကိုလွင် သောက်တဲ့ အရက်ကြောင့်လား .. စိတ်အရမ်းကြီးတဲ့ မမကြီးရဲ့ဒေါသကြောင့်လား .. ကိုကိုလွင် ရဲ့ မပြတ်သားတဲ့ အရှုပ်အထွေးတွေကြောင့်လား … မစူးစမ်း မဆင်ခြင်ဘဲ အပြစ်တင်လွယ်တဲ့ မမကြီးကြောင့်လား … ဒါမှမဟုတ် ဒါတွေအားလုံးကြောင့်ပဲလား ကြာဖြူ ဝေခွဲမရခဲ့ပေမယ့် အဲဒီညက အဖြစ်အပျက်မှာ ကြာဖြူ့ မမကြီးကို ဆုံးရှုံးခဲ့ရပါတယ်။ အရှိန်လွန်ပြီး လှေကားကနေ အောက်ထပ်အထိ ကျသွားခဲ့တဲ့ မမကြီး အဖြစ်က သွေးအိုင်ထဲမှာ တကယ့်ကို မမြင်ရက်စရာ ..
ဘယ်လိုအကြောင်းကြောင့်ပဲ ဖြစ်ဖြစ် မေမေ့အတွက်ကတော့ သူ့အယူအဆကို ပိုမို စွဲမြဲသွား စေပါတော့တယ် .. မမကြီးဆုံးသွားပြီးတော့ ကျန်ခဲ့တဲ သမီးနှစ်ယောက်ထဲမှာ ကြာသပတေးနေ့မှာ မွေးတဲ့ မမငယ်အတွက် ဘာမှ မထူးခြားပေမယ့် မမကြီးလိုပဲ တနင်္ဂနွေနေ့မှာ မွေးခဲ့တဲ့ ကြာဖြူ့အတွက် ဗုဒ္ဓဟူးသားကို အိမ်ထောင်ဖက်အဖြစ် မရွေးဖို့ .. ဗုဒ္ဓဟူးသားကို ရှောင်ဖို့ မေမေ့ကို ကတိ အထပ်ထပ် ပေးခဲ့ရတယ်လေ … ကြာဖြူကိုယ်တိုင်လည်း ခေတ်လူငယ်ဆိုပေမယ့် မပြေးသော်လည်း ကန်ရာက ရှိတာမို့ .. စိတ်ထဲမှာ ဗုဒ္ဓဟူးသားဆိုတာကို မှင်နီတား ကြက်ခြေခတ်ခဲ့ပါတယ် မောင်ရယ် .. မောင့် ကိုလည်း မှတ်ပုံတင်နဲ့ ရက် (၁၀၀) ပြက္ခဒိန်မှာ တိုက်ပြီး ဗုဒ္ဓဟူးသား မဟုတ်ဘူးလို့ သေချာစိတ်ချခဲ့လို့ ချစ်သူအဖြစ် ရွေးချယ်ခဲ့တာပါ .. အဲဒီအချိန်ကတည်းကသာ အမှန်သိခဲ့ရရင် ကြာဖြူ ဘယ်လောက်ပဲ ချစ်နေပါစေ ရွေးချယ်ခဲ့မိမှာ မဟုတ်ပါဘူး မောင် ရယ် .. ကြာဖြူ မောင့်ကို ချစ်တယ်ဆိုတဲ့အကြောင်း ပြောခဲ့မိမှာ မဟုတ်ပါဘူး ….
ဒီအကြောင်းတွေကို ကြာဖြူ ဘယ်လို အင်အားမျိုးနဲ့ မောင့်ကို ပြောပြရပါ့မလဲ .. ဒီလိုအကြောင်းပြချက်မျိုးကို မောင် ကရော လက်ခံနိုင်ပါ့မလား .. ဟာကွာ .. အဓိပ္ပါယ်မရှိတာ လို့ အကျယ်ကြီး ထအော်လိုက်မှာကို ကြာဖြူ သိနေခဲ့ပါတယ် မောင် .. ပြီးရင် မကျေမနပ်နဲ့ ကြာဖြူ့အယူအဆ မှားနေတဲ့အကြောင်း ကျန်တဲ့သူငယ်ချင်းတွေကို ၀ိုင်းပြီး ဖြောင်းဖျခိုင်းမယ် .. လိုအပ်ရင် ဆရာ/ဆရာမ တွေကိုပါ မောင် ပြောပြတော့မှာလေ .. အဲဒီအခါ ကြာဖြူ ခံစားနိုင်မယ် မထင်ဘူး မောင် .. ဒါကြောင့်မို့ ကြာဖြူ တိတ်တိတ်ကလေးပဲ ထွက်လာခဲ့တာပါ .. နားလည်မပေးနိုင်တာကို သိပေမယ့် မောင့် ဆီက ခွင့်လွှတ်မှုလေးတော့ ရချင်သားကွယ် ..
♥ ♥ ♥ ♥ ♥ ♥ ♥ ♥ ♥ ♥ ♥
♪ ♫ ဘယ်ဆီကို မင်းရောက်နေလဲ ♪ ♫ ဘာတွေကို မင်းလုပ်နေလဲ ♪ ♫ ဘယ်သူနဲ့ မင်းရှိနေလဲ ♪ ♫ တွေးမိပါတယ် ♪ ♫ လွမ်းမောရင်းနဲ့ ♪ ♫ စဉ်းစားရင်းနဲ့ ♪ ♫ တစ်ခါတစ်လေ သတိရပါတယ် ♪ ♫
သီချင်းသံကို ကြားတော့ သတိရလိုက်တာ မောင် ရယ် .. ၆ နှစ်ဆိုတဲ့အချိန်အတွင်းမှာ မောင် ဘာတွေ ပြောင်းလဲသွားပြီလဲ ကြာဖြူ သိချင်လိုက်တာ .. ကြာဖြူကတော့ စွဲလမ်းမိတဲ့ ဥပါဒန်ကြောင့် ခါးသီးတဲ့အလွမ်းတွေကို ရင်ထဲမှာ အပြည့်အသိပ် ထည့် သယ်ရင်းနဲ့ပဲ ခြောက်သွေ့တဲ့ ရက်တွေကို တစ်ယောက်တည်း ဖြတ်သန်းခဲ့ပါတယ် ...
မောင် အရမ်းချစ်စရာကောင်းတဲ့ ကောင်မလေးတစ်ယောက်နဲ့ လက်ထပ်တော့မယ်ဆိုတာရယ် .. အိမ်ပြောင်းသွားတယ်ဆိုတာရယ်ကိုတော့ မိခိုင် နဲ့ နောက်ဆုံးတစ်ခေါက် တွေ့တုန်းက သိခဲ့ရတယ် .. အဲဒီသတင်းကြားတုန်းက ဘယ်တော့မှ ပြန်ဆုံနိုင်ခွင့်မရှိတော့ဘူးဆိုတာ သေချာသိခဲ့ရပေမယ့် ကြာဖြူ မောင့် အတွက် ၀မ်းသာခဲ့တာအမှန်ပါ .. ခုလောက်ဆိုရင်တော့ မောင်လည်း မိသားစု သိုက်သိုက်ဝန်းဝန်းနဲ့ ပျော်ရွှင်နေလိမ့်မယ်လို့ ကြာဖြူ မျှော်လင့်ပါတယ်လေ … မောင့် ကို ထားခဲ့ပြီး ၁ လအကြာ မောင့်မွေးနေ့ မှာ ပို့ပေးခဲ့တဲ့ ဖိတ်စာအတု တစ်စောင်ကြောင့် ကြာဖြူ မောင့်အပေါ် သစ္စာမဲ့ပြီး လက်ထပ်ခဲ့ပြီးပြီလို့ မောင်ကတော့ ထင်နေမှာပဲနော် ..
တစ်ခါတစ်လေတော့လည်း ကြာဖြူ့ ဆုံးဖြတ်ချက်တွေ မှားခဲ့သလားလို့ တွေးမိတယ် .. အဲလိုတွေးမိတိုင်းလည်း ပါးပြင်ပေါ်ကို ခပ်နွေးနွေးအရာတွေ ကျလာတယ် .. နောင်တမျက်ရည်ဆိုတာမျိုး ထင်ပါရဲ့ မောင်ရယ် ..
♥ ♥ ♥ ♥ ♥ ♥ ♥ ♥ ♥ ♥ ♥
“ဒါဆို .. ကြာဖြူက ခုထိ လက်မထပ်ရသေးဘူးပေါ့ ဟုတ်လား မမငယ်”
“ဟုတ်တယ် ညီ .. ကြာဖြူက ညီ့ကို သိပ်ချစ်ရှာတာပါ .. မေမေရဲ့ အယူအဆတစ်ခုရယ် .. မမကြီးရဲ့ အဖြစ်အပျက်ရယ်ကြောင့် ညီ့ကို သူ လမ်းခွဲခဲ့တာ”
“ဒါမျိုးတွေကို ကြာဖြူက လက်ခံသတဲ့လား မမငယ် .. ကျွန်တော်တော့ လက်မခံနိုင်ဘူး”
“ညီ လက်မခံနိုင်တာကို ညီမလေးက သိနေခဲ့တယ်လေ .. ဒါကြောင့်လည်း သူ ဘာကိုမှ မရှင်းပြဘဲ တိတ်တိတ်ကလေး ထွက်လာခဲ့တာ”
“အိမ်ပြန်ရောက်တော့ မမငယ်ကို ပြန်ပြောပြပြီး ငိုလိုက်တာလေ .. သိပ်သနားဖို့ကောင်းတာပဲ .. ဒါနဲ့ .. ညီ ကရော ဘာလို့ လက်မထပ်ဖြစ်တာလဲ”
“အဟင်း .. ဒီအရွယ်ရောက်မှ ပြောရတာလည်း ခပ်ရှက်ရှက်ပဲ မမငယ်ရ .. တကယ်တော့ အချစ် မပါတဲ့ အိမ်ထောင်ရေးကို ကျွန်တော် ဘယ်လိုမှ လက်မခံနိုင်ခဲ့တာပါ .. ကြာဖြူ ကျွန်တော့်ကို ခြေရာဖျောက်သွားတဲ့အချိန်မှာ ကျွန်တော် အရမ်းခံစားရတာလေ .. မငယ်တို့မြို့ကို ကျွန်တော်လိုက်လာဖို့ စီစဉ်နေတဲ့အချိန်မှာပဲ ကြာဖြူ့မင်္ဂလာဆောင်ဖိတ်စာ ကျွန်တော့်လက်ထဲရောက်လာခဲ့တယ် .. လူက လေပြီး စာထဲလည်း စိတ်မပါ … အလုပ်လုပ်ဖို့ ခြေလှမ်းစထားတာတွေလည်း ဘာမှ မလုပ်နိုင်ဘူး .. ကျွန်တော် စာမေးပွဲ တစ်နှစ်ကျသွားတယ် မမငယ် .. အဲဒီမှာ ကျွန်တော့်ဘ၀ထဲကို သော်တာ ရောက်လာခဲ့တာ .. ကျွန်တော့်ကို စာပြပေးရင်း .. ကြာဖြူ့ကြောင့် လေနေတဲ့ ကျွန်တော့်ကို နှစ်သိမ့်ပေးခဲ့တယ် .. မိဘချင်းကလည်း လုပ်ငန်းတူ ဖြစ်နေတော့ ကျွန်တော်တို့ လက်ထပ်ဖို့ အထိ စီစဉ်ဖြစ်ကြတာပါ .. ဒါပေမယ့် မမငယ်ရယ် .. ကျွန်တော် ခုနက ပြောသလိုပါပဲ .. တကယ်တမ်း လက်ထပ်ကြတော့မယ်ဆိုတော့ ကျွန်တော် သော်တာ့ကို မချစ်တာ သေသေချာချာ သိလာတယ်.. အဲဒီအချိန်မှာ ကြာဖြူ့ကိုလည်း ပိုပြီး သတိရတယ် .. နောက်ဆုံးတော့ သော်တာကိုယ်တိုင်ကလည်း ကျွန်တော့်စိတ်ကို သိသွားလို့ နှစ်ဖက်မိဘတွေကို အသေအချာရှင်းပြပြီး လက်ထပ်ဖို့ ကိစ္စကို ဖျက်သိမ်းခဲ့တာပါပဲ မငယ်”
“အဲဒီကိစ္စတွေကြောင့် ဖေဖေ နဲ့ မေမေ က ကျွန်တော့်ကို ခုထိ အမြင်မကြည်လင်လို့ ဒီမြို့မှာ ကျွန်တော့်သူငယ်ချင်းနဲ့ အလုပ်အတူတူ တွဲလုပ်နေတာ”
“ဖြစ်ရလေ ညီရယ် .. မငယ် စိတ်မကောင်းလိုက်တာ .. ညီမလေးနဲ့ ညီညီ သိပ်ချစ်ကြရက်နဲ့ကွာ”
“ဒါနဲ့.. မငယ်ကရော .. ဒီမြို့ကို ဘယ်လိုလုပ်ရောက်နေရတာလဲ”
“မငယ်အမျိုးသားက ဒီမြို့သားလေ .. မငယ်လည်း အိမ်ထောင်ကျပြီးကတည်းက သူနဲ့ လိုက်နေတာ .. သူ့မိဘတွေနဲ့ အတူတူဆိုပါတော့ .. တိုက်ဆိုင်တာ တစ်ခုကို ပြောပြရဦးမယ် သိလား .. မငယ်ရဲ့ ယောက္ခမတွေကလေ တနင်္ဂနွေ နဲ့ ဗုဒ္ဓဟူး လက်ထပ်ထားကြတာ ညီညီရဲ့ .. တစ်ခါတစ်ရံ စကားကတောက်ကဆ များပြီး သေးသေးမွှားမွှား ရန်ဖြစ်တတ်တာကလွဲရင် သိပ်အားကျဖို့ကောင်းတဲ့ အိမ်ထောင်ရေးပါ ညီရယ် .. ဒီအသက်အရွယ်အထိကို တစ်ယောက်နဲ့ တစ်ယောက် နားလည်မှုတွေနဲ့ ဂရုစိုက်ကြဆဲပဲ .. အဲဒါကိုမြင်တော့ မမတို့ ပိုနောင်တ ရမိတယ် .. မငယ်တင်မကဘူး .. မေမေပါ စိတ်မကောင်းဖြစ်နေတယ်လေ ..
အဖြစ်အပျက်ဆိုးတစ်ခုကြောင့် စွဲမြဲသွားမိတဲ့ အယူအဆမှားတစ်ခုကြောင့် ညီညီ နဲ့ ညီမလေးတို့ ခံစားခဲ့ကြရတာ
မေမေလည်း အခုတော့ တရားစခန်းတွေ ၀င်ပါများတော့ အရင်လို အယူမသည်းတော့ဘူးလေ .. မမကြီးရဲ့ အဖြစ်အပျက်က ဖြစ်ချိန်တန်လို့ ဖြစ်ခဲ့ရတာဆိုတာကို လက်ခံနိုင်ခဲ့ပြီပေါ့”
♥ ♥ ♥ ♥ ♥ ♥ ♥ ♥ ♥ ♥ ♥
ဖြစ်ရလေ ကြာဖြူရယ် .. ကြာဖြူ့ကို မောင် သနားလိုက်တာ .. ဘယ်လောက်တောင် ခံစားနေရမလဲကွာ .. မောင် အထင်လွဲခဲ့မိတာတွေအတွက် တောင်းပန်ချင်တယ် .. ကြာဖြူ ပို့လိုက်တဲ့ ဖိတ်စာတစ်စောင်ကြောင့် ကြာဖြူ မောင့်အပေါ် သစ္စာဖောက်တယ်ဆိုပြီး သော်တာနဲ့ လက်ထပ်ဖို့ စီစဉ်မိခဲ့တာပါ .. မောင် မုန်းသွားအောင် လုပ်ကြံဖန်တီးခဲ့တဲ့ ဖိတ်စာမှန်းသာ သိခဲ့ရင်လေ ကြာဖြူ ဘယ်နေရာပဲ ရောက်နေနေ မောင် လိုက်ရှာခဲ့မှာပါ .. ကြာဖြူရယ် ခုတော့ မောင် တို့ အကြာကြီး ခွဲနေရတယ်ကွာ ..
ကုန်သွားတဲ့ အချိန်တွေကို မောင် နှမြောမိတယ်
တစ်သက်လုံး အနားမှာ ဂရုစိုက်မယ် .. ခွဲနေရတဲ့အချိန်တွေကို အတိုးချပြီး မောင် ပိုဂရုစိုက်ပါမယ် ကြာဖြူရယ် ..
"သေဆုံးသွားတဲ့ ညီမလေးရဲ့ နှလုံးသားကို ပြန်ပြီး အသက်သွင်းပေးဖို့ ညီညီ တစ်ယောက်ပဲ တတ်နိုင်မှာပါ .. မငယ် တောင်းဆိုပါတယ် ညီညီ ရယ် .. ခြောက်သွေ့နေတဲ့ ညီမလေးရဲ့ ဘ၀လေးကို ပြန်ပြီး လှည့်ကြည့်ပေးပါ"
မမငယ် ရဲ့ စကားတွေကို ပြန်လည် ကြားယောင်နေမိတော့ မောင့် ခြေလှမ်းတွေ မြန်လာတယ် ကြာဖြူ
မောင့်ကို မြင်ရင် ကြာဖြူ ဘယ်လိုခံစားရမလဲ မောင် သိချင်လိုက်တာ
ဘာမှမဖြစ်သလိုပုံစံမျိုး နဲ့ နှုတ်ဆက်ဦးမှာလား ကြာဖြူ ..
မရတော့ဘူး ကြာဖြူရယ် .. အခုအချိန်ကစပြီး ကြာဖြူ အရင်လို မခံစားစေရတော့ဘူး .. အရင်ထက် ဆတိုးတဲ့ အချစ်တွေနဲ့ မောင် တို့ ချစ်ကြမယ် .. ပိုပြီး တန်ဘိုးထားကြမယ်နော် ..
မောင် လာနေပြီ ကြာဖြူ .. အယူအဆ တစ်ခုအတွက်နဲ့ အချစ်ကို စတေးခဲ့ရတဲ့ မောင့် ရဲ့ အချစ်သခင်မလေးကို ဒဏ်ပေးဖို့ မောင် ကြာဖြူဆီ ရောက်အောင် လာနေပါပြီ ..
ဘယ်တော့မှ မောင့်အနားက ထွက်မသွားတော့ဖို့ပေါ့ ....
♥ ♥ ♥ ♥ ♥ End ♥ ♥ ♥ ♥ ♥ ♥
ပြီးအောင်ဖတ်ပေးတဲ့သူတိုင်းကို ကျေးဇူးတင်ပါ၏ .. :D
သံစဉ်ဖြူဖြူ
၂၇.၇.၂၀၁၁
